كيفية إنشاء كلمات سر والحفاظ عليها

مَرَدُّ هادشي هو العدد الهائل ديال الصديقات والأصدقاء… شحال من واحد كايتبيراطالو المايل أو أي حساب شخصي ديالو.. وهو فالحقيقة الفرد كايتحمل مسؤولية أيضا فهادشي حيت لا يعقل انك تدير فكلمة السر رقم الهاتف ديالك او تاريخ الازدياد … طبعا نظرا لأننا كانشربو نفس الحليب فحنا ايضا عندنا تفكير متقارب الى ابعد حد… المهم تبع هادشي ومايكون غير الخير.. أه بالمناسبة ماكاينش شي أمن أو أمان 100% ، وكل المحاولات هي فالحقيقة محاولة لتفادي ما لا يحمد عقباه ..
أولا : لابد انك تدير #كلمة_سر_طويلة تتجاوز 24 حرف وكل ما كانت طويلة كل ما كانت نسبة اكتشافو طويلة وتستغرق وقت ..
ثانيا : خصكم تستعملو #كلمة_سر_معقدة يعني استخدامو فيها أرقام، وأحرف (لاتينية) كبيرة وأخرى صغيرة، وعلامات وقف، ورموز خاصة. باش يزيد من صعوبة اختراق كلمة السر الخاصة بكم …
ثالثا : حرصوا على أنكم تغيرو #كلمات_السر_بشكل_منتظم. قلّصو المخاطر المحتملة من خلال تغيير كلمات السر الخاصة بكم بشكلٍ منتظمٍ ولا سيّما إلى كنتو كاتكونيكطاو فلقهاوي او سيبيرات أو فشي حواسيب أخرى ماشي ديالكم؛ وماشي معناه أن كلمة السر ديالك واخا قديمة ماتخترقاتش غير مزال ما لقيتي مولى دعوتك حيث كلمات السر الجديدة السهلة الاختراق أكثر خطورة من كلمة السر الآمنة جداً اللي عاقلين عليها من عام الميرك والياهو والإمسن.
رابعا : خص ديما كلمة السر تكون مخبعة مزيان وحرصوا انكم ما تسيفطوهاش فشي نصّ عادي ف sms او messenger أو whatsapp .. استخدموا كلمة السر الخاصة بكم مع بروتوكول آمن ( من بعد ونهضرو عليه بشكل مفصل )
خامسا : احرصوا على عدم استخدام كلمة السر نفسها لحساباتٍ عديدة. قلّصوا احتمال الضرر الي يقدر ينتج عن اكتشاف كلمة السر ديالكم استعملو كلمات سر مختلفة لحسابات عديدة وتكون مختلفة ايضا حتى فتركيبتها وطريقة استعادتها الى تعذر الدخول بها شي مرة.
سادسا : تجنبو انكم تدخلو مواقع اخرى عن طريق الفيسبوك او الجميل هناك امكانية كبيرة يتم اختراق الخصوصية ديالكم خصوصا ان الاكثرية ما كايقراش شروط الدخول والتسجيل فالمواقع لهذا من الاحسن تتسجلو ببريد ثانوي وب كلمة سر خاصة بالموقع اللي بغيتو تدخلولو

خلاصة: حرصو على أنكم تخلّيوْ كلمات السر الخاصة بكم طويلة ومعقدة وعشوائية.. تجنبو استخدام معلوماتٍ شخصية في كلمة السر.. ماديروش فيها أرقام هواتف، وتواريخ ميلاد، وأماكن ولادة، إلخ… يقدر يكون اختراق كلمات السر هذه من قبل أشخاص كايعرفو عليكم الشادة والفادة… او يقدرو يوصلو ليها من خلال مواقع التواصل الاجتماعية ديالكم…. ولهذا ولأشياء أخرى ردو البال ..

ميعادنا فمعلومة جديدة …  دوزو بخير!

مدونة زوايا

زوايا فريق شاب مؤلف من 10 شباب عرب مختلفي التخصصات والاهتمامات و غزيري الأفكار يجمعهم حب التدوين والرغبة في إثراء الويب العربي بمحتوى مفيد فريق زوايا ذو أفكار خلاقة وعزيمة متأهبة يعدكم بمحتوى مدوناتيٍّ أقل ما يقال عنه أنه استثنائي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *