حرفة أم وظيفة أيهما الأفضل

علاش كنحڭرو الحرفة؟

كاين بعض الأعمال اليدوية أو الحرف والمهن للي مولاها خصو يتقاضى أجر محترم.. وزيادة على الأجر المحترم خص تكون عندو تغطية اجتماعية وتعويضات عائلية في المستوى.. هذا الشق المادي.. فالشق المعنوي واللي هو الأساس خصو مكانة جدددددد محترمة كذلك فالمجتمع..

المجتمع يبخس كل ما هو يدوي حرفي.. بل حتى الشباب كايبحث على الوظيفة اعتقادا منه أنها الخلاص.. في حين كيتهرب من كل هو عمل حرفي يدوي.. صباغ.. نجار.. تريسيان.. بلومبي.. حداد.. حلاق.. علاش؟ معرفتش…

المجتمع كايبخس حق الحرفة وكيشوفها ديما بشوفة ناقصة.. وكيظن ان الحرفيين فاشلين خصوصا ف الجانب الدراسي.. في حين هوما أشخاص عندهم ملكات وخيال ماقدراتش المنظومة التربوية ديالنا ترويض ديالو وإدماجه ضمن قطيع الطلاب الطامحين للوظيفة فقط.. الوظيفة اللي يقيل فيها غي ڭالس ويقبط صالير ف راس الشهر..

جانب آخر للي هو المستفز فالموضوع.. هو بعض العائلات كتظن أن الشخص الموظف.. شخص خارج التصنيف.. خصو احترام وتقدير فوق اللازم.. حيث ممكن تلقى شقيقين أو شقيقتين.. الأول موظف.. والثاني حرفي.. فتلقى الأول يحظى بمكانة مرموقة كما لو معرت شنو صنع فملك الله.. في حين الحرفي ديما محكور.. ويُنظر له بنظرة احتقار واستصغار..؟؟!!

بعض العائلات تاني تقدر تزوج بنتها لموظف وخا يتوشي غ ألفين درهم ومتعطيهاش لحرفي للي يقدر يدير بريكول فتلت أيام يصور فيها 3000 درهم حلالا طيبا.. عند بالها الموظف راه الدولة هاديك.. خصها تباها بيه قدام العائلة وداكشي .. ماشي مجرد حرفي صنايعي كسول معندو لا تغطية صحية إجبارية والا صندوق ضمان اجتماعي يخلصو مورا التقاعد… ؟؟!!!!

هادشي ماشي تهجم على الموظفين والموظفات.. أو تبخيس قيمتهوم وعملهوم .. ولكن هاد ثنائية فتناول هاد الموضوع عمرها بغات تفهملي أو تدخل راسي.. معرت علاش.. مال الحرفي..

كون جيت رئيس حكومة أو رئيس دولة كاااع.. لجعلت عاملي النظافة (للي كيجمعو الزبل حاشاكم) متساوي الدخل مع الأساتذة الجامعيين والمهندسين والدكاترة.. حيت هوما فعلا مهندسين اللي بلا بهم كون غرقنا ف زبلنا عزكم الله.. وقس على هاداك مع باقي الحرف.. لكن ضومااااج.. وخير ما نسالي به المقال ديالي هو ما قالو ناس زمان: الحرفة إدا ما سترات تْغني.

حرفة أم وظيفة.. أيهما الأفضل

تعليق واحد

اترك تعليقاً

لن يتم نشر عنوان بريدك الإلكتروني.