نقصان ساعة

حوار سريع بين زوجين حول "الساعة الجديدة"

هو: غادي نتصل بمي

هي: واش بغيتي تخلعها باركا عليها غير خلعة زيادة شهر ديال الحجر الصحي !!

هو: علاش غنخلعها ؟!!

هي: راها غتكون باقا ناعسة حيت كترجع النعاس من مورا صلاة الفجر.

هو: واش دبا باقي شي نعاس

هي: عندها باقي الحال

هو: على شحال الساعة دبا ؟!!

هي: التسعود ..

هو: ايوا على مي كتبقى تال التسعود وهي ناعسة !!!

هي: أنا ماقلتش هادشي

هو: قلت باقا ناعسة

هي: تسعود عندنا والسبعة عندها ..

هو: أش كتخربقي را عندهم التمنية دبا .. بينا وبينهم غير ساعة.

هي: الله يجيبك على خير..من اليوم ولات جوج السوايع

هو: علاش..ياك المغرب مابقى يزيد ما ينقص؟!!

هي: لاواه واش نتا غير جيتي لفرنسا نسيت را المغرب كينقص ساعة رمضان

هو: الله يتبثنا على الشهادة ..

هي :اللهم آمين ..ودبا شكون لي كيخربق أنا ولا نتا ..

هو: (بثقة) نتي

هي: الرجوع لله ..

هو: دبا مني نقصو ساعة غيوليو بحالنا عندهم التسعود ..غادي نعيط لمي ..ضيعت لي الوقت غير في كثرة فهامتك

هي: يابوالعريف ..راه نقصو ماشي زادو

هو: وفهمت

هي: مافهمتي والو ..اجي نفهمك بحساب الخوشيبات: كان بينا وبينهم ساعة يعني مني يكون عندنا التسعود هما يكون عندهم التمنية ، ومني دبا هما نقصو ساعة ولات بينا وبينهم ساعتين يعني عندهم شحال ؟

هو: السبعة

هي (مصفقة): حسن جدا. وسير دير حوايج الصابون في الماكينة بينما تفيق مك

هو (بعصبية): مك.. قولي خالتي رها زعما خالتك..

هي (ضاحكة): خالتي وأحسن الخالات ..

هو (بعصبية أكثر): فيناهو صابون ماكينة الصابون ؟

هي (تحاول عدم الضحك): راه في بلاصتو

هو: كتعرفي عدويا الصابون

هي: حتى أنا عدوي الصابون، التجفاف، الطياب، تفياق الدراري، ترتيب الحوايج في الماريو، العجينة .. ولكن اش غنديرو .. نعديو ولا هاد الدار غتولي زريبة وماغادي ماناكلو مانشرب ..

هو (ضاحكا): ونولي في حجر صحي داخل حجر صحي ديال الصح ..

هي: ايوا نوض دير الحوايج في الماكينة باش تفيق الدراري

هو: خليهم ناعسين راه اليوم غير الأحد

هي: نوض فيقهم راه ولات يامك ويامهم كلها حد مع هذا الحجر الصحي..ومني يجي رمضان غادي زيدو حدودا أخرى..

هو (بعصبية): راني بغيت نكمل قراءة كتابي

هي: كاع بغينا نكملو قراءة كتوبتنا ..نوقف بجوح نقضيو شغال الدار والدراري باش نجلسو بجوح نكملو كتوبتنا

هو: وزيدون عندي خدمة كثيرة خصني نرسلها اليوم ..

هي: تانا عندي خدمة كثيرة ، المدير صيفطها البارح مع طناش الليل وقالك بغاها نهار الاثتين مع سبعة الصباح .نكملو شغال الدار وكلا يدير خدمتو ..

هو (بتأفف): ياربي السلامة ماتعاطقيش

هي: يكفي أنني مكننطلبش منك العجينة

هو (بتهكم): هي لي بقات ..وعاد مالكي ياك العجانة كدير كلشي

هي: ايوا أسيدي اليوم غنخلي ليك العجينة وماكينتها لي غادير ليك كل شي..

هو: ولكن أنا منعرفش نكرس ومنحملش نوقف على الفران ..

هي: شوف مع العجانة باش تدير لي كل شي . انا غادي نطيب الفطور . باش من بعد الفطور تعيط لخالتي .

هو: بناقص هذا التعيطة غادي تعرف من صوتي راني مقلق

هي (بلؤم): ياك لاباس أش قلقك عادي كنت صحة سلامة ؟!!

هو (رامقا إياها بنظرة حادة): تقتلي الميت وتمشي في جنازتو..

هي: الله يحد الباس ..مالك اخويا على الصباح القتيلة والجنازة ..

هو (متجها للحمام حيث توجد آلة التصبين): من الأحسن نسكت ونبدل ساعة بأخرى..

هي: الله يكملك بعقلك ..نمشي نفيق الدراري ..وشتي باش متقولش أنني مخليا عليك كل شي ..

هو (بتهكم): لله يخلف عليك …حنينة

هي (ضاحكة): يالاه ضحك ونبداو نهار جديد مزيون ..

هو: وييه يالاه قلنا بسم الله مع الحجر الصحي..

هي: ماحنا على فالك آخويا ، إن شاء الله هذا آخر تمديد ..

هو: امتى غيزيدو ساعة ؟

هي: عندنا ولا عندهم ؟!

هو: عندهم

هي: من بعد رمضان ..

هو: ومايبقاش بينا وبينهم والو

هي (بنرفزة): ولا غتبقى ساعة بيينا وبينهم

هو: وعلاش واحد الوقت ماكان بينا وبينهم والو..

هي: هذا في شهر أكتوبر حنا غنقصو ساعة ونزلو عندهم..

هو: والله تاتلفت مع هاذ زيد ونقص ..

هي: ومين سمعك على رأي خوتنا المصريين.

مريم أبوري

مدونة من فرنسا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *